Sulmi rus me raketa e dronë godet centralet elektrike, 4 të vrarë — Kievi nën tym

Sulmi rus i kryer brenda natës goditi centralet elektrike dhe la kryeqytetin ukrainas nën një shtresë tymi të mërkurën, me katër të vrarë të raportuar deri tani, siç njofton agjencia Reuters.

Gjatë sulmit, sipas zyrtarëve ukrainas, Rusia lëshoi 188 dronë së bashku me raketa balistike e kundëranije — pesë raketa dhe 155 dronë u rrëzuan, por dëmet ishin të konsiderueshme. DTEK, operatori i energjisë, njoftoi se ka rivendosur energjinë për 8 mijë familje në kryeqytet.

Kryetari i Kievit, Vitali Kliçko, konfirmoi se nga sulmi u vranë katër persona — dy gra dhe një fëmijë 14-vjeçar humbën jetën brenda natës, ndërsa një person tjetër u vra të mërkurën në një magazinë në kryeqytet. Ai tha gjithashtu se rrënoja u gjetën në një ambasadë perëndimore në qendër të Kievit, pa dhënë më shumë detaje.

Sulmi kaloi kufijtë e Ukrainës: një dron shpërtheu pranë fshatit Hirbovet në Moldavi, ndërsa Rumania dhe Polonia ngritën avionë ushtarakë si masë paraprake. Fluturimet u pezulluan përkohësisht në aeroportet polake të Lublin dhe Rzeszow.

Rusia pretendon se goditi një qendër të dhënash në Kiev, centrale elektrike në rajonin e Kievit, një kompleks industrial në Odesa dhe infrastrukturën e portit Izmail, por të pavarur nuk kanë mundur të verifikojnë plotësisht këto pretendime, raporton Reuters.