TEHERAN – Kalimet në Hormuz regjistrojnë 50% rënie

– Vetëm 17 anije transporti mallrash kaluan në fundjavë përmes Ngushticës së Hormuzit, kundrejt 37 anijeve një javë më parë, sipas të dhënave të trafikut detar, ndërsa tensionet në Gjirin Persik vijojnë dhe SHBA-ja e Irani mbeten në ngërç, shkruan Euronews com.

Trafiku i dukshëm përmes kësaj ngushtice, një nga korridoret kryesore të transportit të naftës dhe gazit të lëngshëm natyror në botë, është reduktuar ndjeshëm.

Megjithatë, prodhuesit e Lindjes së Mesme vijojnë të eksportojnë naftë me cisterna që lundrojnë me transponderët e fikur, duke e bërë më të vështirë gjurmimin e tyre.

Sipas të dhënave paraprake të kompanisë së analizës së të dhënave detare Kpler, deri në orën 07:06 GMT të së hënës, pesë anije të gjurmueshme kishin dalë nga ngushtica të dielën, ndërsa dy cisterna të vogla nafte kishin hyrë në Gjirin Persik.

Ndër anijet që u larguan ishte transportuesja shumë e madhe e naftës së papërpunuar Pinios, dy cisterna që transportonin produkte të rafinuara të naftës, si dhe dy anije bosh për transportin e mallrave të thata dhe gazit.

Ren e trafikut detar vjen në një kohë kur tensionet në rajon kanë ndikuar ndjeshëm në lëvizjen e anijeve dhe në transportin ndërkombëtar të energjisë.