TEL AVIV – Izraeli ndërton barriera të reja tokësore në Gaza, mijëra familje zhvendosen sërish

TEL AVIV, 30 korrik /ATSH-DPA/- Izraeli po zgjeron barrierat tokësore përgjatë zonës së kontrollit në Rripin e Gazës, duke detyruar familje të tjera palestineze të largohen nga shtëpitë dhe kampet e tyre. Banorët thonë se nuk kanë më asnjë vend ku të strehohen.

Sipas një investigimi të BBC-së, ushtria izraelite ka zhvendosur më në perëndim blloqet e verdha prej betoni, që shënojnë vijën e kontrollit “Vija e Verdhë” dhe ka ndërtuar diga të mëdha dheu, të cilat në disa zona shtrihen qindra metra përtej kufirit të përcaktuar nga armëpushimi i ndërmjetësuar nga SHBA-ja, në tetor.

Barrierat e reja tashmë shtrihen në mbi 42 kilometra, duke mbuluar rreth 85% të vijës së kontrollit, ndërsa ekspertët vlerësojnë se këto punime tregojnë se Izraeli po përgatitet për një prani afatgjatë ushtarake në Gaza.

Banorët në disa zona, përfshirë Qyteti i Gazës, Khan Younis, Deir al-Balah dhe al-Mawasi, raportojnë se janë detyruar të largohen pas urdhrave të evakuimit, ndërsa shumë tenda, shtëpi dhe toka bujqësore janë shkatërruar.

Hamasi akuzon Izraelin se po shkel marrëveshjen e armëpushimit, duke zgjeruar zonën e kontrollit.

Nga ana tjetër, ushtria izraelite i ka mohuar këto akuza dhe tha se barrierat dhe pozicionet e reja, janë masa sigurie për të mbrojtur Izraelin dhe për të parandaluar rindërtimin e kapaciteteve ushtarake të Hamasit.

Sipas banorëve të Gazës, zgjerimi i vazhdueshëm i zonës së kontrollit, po e ngushton edhe më shumë hapësirën, ku mund të jetojnë mbi dy milionë palestinezë, në kushte tashmë shumë të rënda humanitare. /