Tërmeti në Filipine, shkon në 46 numri i viktimave. Vijojnë kërkimet për të zhdukurit

Dita-ditës, shkalla e shkatërrimit të shkaktuar nga tërmeti me magnitudë 7.8 Rihter i cili ra disa ditë më parë në Filipine po zbulohet gjithnjë e më shumë, me numrin zyrtar të autoriteteve që tani është 46 të vdekur dhe qindra të plagosur.

Ekipet e shpëtimit vazhdojnë të kërkojnë për persona të zhdukur në rrënojat e ndërtesave të shembura dhe lista e viktimave pritet të rritet më tej në orët dhe ditët në vijim.

Tërmeti, i cili ndodhi në det pranë brigjeve të ishullit Mindanao, rezultoi në shembjen e ndërtesave dhe rrëshqitje të dheut në shumë zona.

Agjencia filipinase e fatkeqësive tha se 45 persona kishin vdekur dhe shtoi se ende po kërkonte 17 persona që kanë mbetur të zhdukur.

Megjithatë, numërimi i saj nuk merr parasysh trupat e numëruar nga mbrojtja civile. Sipas kësaj të fundit, Joey Deluvio, 39 vjeç, u gjet i vdekur në rrënoja.

Operacionet e kërkim-shpëtimit vazhdojnë pavarësisht rrezikut që paraqesin lëkundjet pasuese.

Qindra lëkundje pasuese të forta janë regjistruar që nga ajo kryesore e pardjeshme në mëngjes.

Filipinet përjetojnë qindra tërmete çdo vit dhe ndodhen në pjesë tektonikisht komplekse të “Unazës së Zjarrit” të Paqësorit, një zonë sizmike aktive që shtrihet nga Amerika e Jugut në Lindjen e Largët Ruse.

Shkollat, të cilat sapo ishin rihapur të hënën pas një pushimi të gjatë, mbetën të mbyllura ndërsa autoritetet kontrolluan gjendjen e ndërtesave shkollore, mijëra prej të cilave pësuan dëme të vogla deri të rënda, tha Alejandro për stacionin radiofonik DZBB.

Shumica e vdekjeve të tjera ndodhën në provincën Davao Occidental, shumica e tyre për shkak të rrëshqitjeve të dheut dhe shembjeve të ndërtesave, sipas deklaratave të bëra nga Rafaelito Alejandro, një zyrtar i mbrojtjes civile, në një stacion radioje lokal.

Instituti Filipinez i Vullkanologjisë dhe Sizmologjisë (Phivolcs) regjistroi 23 lëkundje të forta pasuese, ku më e forta ishte 6.7 ballë në shkallën Rihter, duke detyruar disa banorë të kalonin natën në strehimore dhe tenda.

Në General Santos dhe Sarangani, pacientët u trajtuan në tenda të improvizuara ndërsa zyrtarët punonin për të siguruar sigurinë e spitaleve, tha Sekretari i Shëndetësisë Teodoro Erbosa për DZBB, duke shtuar se rivendosja e energjisë elektrike ishte kritike pasi ndërprerjet e energjisë kufizonin aksesin në trajtime të ndjeshme dhe të sofistikuara të nevojshme nga pacientët.