“The Times”: Shqipëria, destinacioni i mundësive në Mesdhe

Në një kohë që destinacionet klasike si Italia, Spanja apo Greqia po përballen me mbingarkesë, vëmendja e prestigjiozes britanike “The Times” është ndalur te Mesdheu Lindor, ku Shqipëria renditet si kryefjala e këtij sezoni.

Artikulli i fundit i dedikuar udhëtimeve, e cilëson Shqipërinë si një vend që po gjen veten me shpejtësi në tregun global, duke ofruar një kombinim mes luksit dhe çmimeve konkurruese.

Sipas “The Times”, përtej plazheve, Shqipëria po tërheq turistët me trashëgiminë e pasur arkeologjike.

Apollonia dhe Butrinti vlerësohen si dëshmi të rëndësishme të historisë romake, ndërsa qyteti i Beratit veçohet për arkitekturën e tij unike otomane.

Gazeta nënvizon se ndryshe nga zonat e tejmbushura si Bregu i Amalfit në Itali, në brigjet shqiptare jahtet nuk janë ende një shqetësim për peizazhin, duke ofruar më shumë qetësi.

Edhe pse nga ana tjetër artikulli përmend edhe interesin e çifitit amerikan, Ivanka Trump dhe Jerard Kushner për të investuar në ishullin e Sazanit.

Artikulli specifikon Himarën si një nga pikat më atraktive, ku hotelet e reja ofrojnë shërbime moderne të stilit ‘Ibiza’, por me kosto më të ulëta.

Operatorët turistikë ndërkombëtarë kanë rritur ofertat për turet tetë-ditore që ndërthurin kulturën dhe detin, duke shfrytëzuar edhe aeroportin e Korfuzit si urë lidhëse përmes trageteve.

Ky vlerësim i radhës nga media ndërkombëtare konfirmon se Shqipëria nuk është më një destinacion secret por një rival i fortë i vendeve fqinje, duke u kthyer në zgjedhjen e parë për ata që kërkojnë të shijojnë Mesdheun pa shpenzimet marramendëse të metropoleve europiane.

Klan News

/tvklan.al