Thirrje nga xhamitë e Kosovës për Marshin e 12 shtatorit në Prishtinë

Bashkësia Islame e Kosovës (BIK) ka bërë thirrje për pjesëmarrje në marshin që do të mbahet më 12 shtator në Prishtinë, në mbështetje të ish-pjesëtarëve të Ushtrisë Çlirimtare të Kosovës që po mbahen në Hagë.

Sipas BIK-ut, me rekomandim të kryetarit të saj, Myftiut Naim ef. Tërnava, në të gjitha xhamitë e Kosovës gjatë hytbes së xhumasë është bërë thirrje për pjesëmarrje në këtë marsh.

Myftiu Tërnava ka shprehur mbështetjen e tij për nismën, duke rekomanduar që besimtarët të marrin pjesë në marshin e organizuar në shenjë solidariteti dhe përkrahjeje për ish-ushtarët e UÇK-së.

“Ky është një tubim qytetar në mbështetje të lirisë, drejtësisë, dinjitetit dhe kujtesës sonë kombëtare, si dhe në përkrahje të ish-krerëve të UÇK-së. Le të jemi të bashkuar, të qetë dhe dinjitozë. Le ta dëshmojmë se nuk harrojmë sakrificën e atyre që kontribuuan për lirinë e Kosovës dhe se kërkesa jonë është drejtësia dhe trajtimi i drejtë”, thuhet në mesazhin e hytbes së xhumasë.

BIK ka rikujtuar se ditë më parë Myftiu Tërnava kishte pritur në takim përfaqësuesit e organizatës “Liria ka Emër”, të kryesuar nga Eliza Hoxha, ku kishte shprehur mbështetjen e tij për organizimin e marshit.

Marshi do të mbahet më 12 shtator në Prishtinë, në shenjë solidariteti me ish-krerët dhe ish-pjesëtarët e UÇK-së që po përballen me proces gjyqësor në Hagë.

Ky mbulim ekskluziv nga Gjykata Speciale në Hagë mundësohet nga Edil Project Company.