Tivar: Nënkryetarët e komunës pritën delegacionin e anijes ushtarake amerikane ‘USNS Medgar Evers’

Nënkryetarët e Komunës së Tivarit, Tanja Spiçanoviq dhe Damir Rashketiq, pritën sot delegacionin e anijes ushtarake amerikane “USNS Medgar Evers”, të kryesuar nga kapiteni Erik Lenardson, me rastin e qëndrimit të anijes në portin e Tivarit, siç njofton portali malazez CdM.

Takimi ishte rast për të theksuar bashkëpunimin cilësor në kuadër të aleancës së NATO-s dhe rëndësinë e veprimit të përbashkët ndaj sfidave me të cilat përballen shtetet partnere. Sipas raportimit të CdM-së, gjatë bisedës u theksua se vizita të tilla forcojnë besimin e ndërsjellë dhe marrëdhëniet e mira të partneritetit.

Nënkryetarja Spiçanoviq i njohu mysafirët me potencialet ekonomike, turistike dhe kulturore të Tivarit, duke vënë në pah hapjen dhe karakterin multikulturor të qytetit, si edhe rëndësinë e kësaj vizite për thellimin e bashkëpunimit të bazuar në përkushtimin e përbashkët ndaj vlerave demokratike dhe qytetare.

Nënkryetari Rashketiq u prezantoi mysafirëve një pjesë të historisë së pasur të Tivarit dhe foli për diasporën e madhe tivariane në SHBA, e cila jep kontribut të rëndësishëm në zhvillimin e qytetit dhe të shtetit.

Kapiteni Lenardson falënderoi për pritjen e ngrohtë dhe mikpritjen, duke theksuar se qëndrimi në Tivar është edhe mundësi që delegacioni dhe ekuipazhi ta njohin më nga afër qytetin, trashëgiminë e tij kulturore dhe veçoritë e tij.