Tonelata peshqish kanë ngordhur në Lushnjë, rezervuari u zbraz për rikonstruksionin e portës

Tonelata peshqish kanë ngordhur në rezervuarin e Kasharajt, në Lushnjë, pas rënies së ndjeshme të nivelit të ujit.

Fillimisht u ngritën dyshime se rezervuari mund të ishte tharë si pasojë e mungesës së reshjeve. Sipas informacionit të bërë publik, megjithatë, ulja e nivelit të ujit lidhet me zbrazjen e rezervuarit për shkak të punimeve që Bashkia e Lushnjës pritet të nisë për rikonstruksionin e portës dalëse.

Zbrazja ka lënë zona të rezervuarit me baltë dhe shumë pak ujë, duke shkaktuar ngordhjen e një sasie të madhe peshqish.

Pamjet tregojnë një numër të madh peshqish të ngordhur të shpërndarë në shtratin e rezervuarit.

Ende mbetet për t’u sqaruar nëse, përpara zbrazjes së rezervuarit, ishin marrë masa për zhvendosjen ose mbrojtjen e faunës ujore dhe cili është dëmi i plotë mjedisor.

A post shared by Euronews Albania (@euronews_albania)