Vance: Besojmë se lideri suprem iranian është gjallë, por “i shkëputur” — fajëson Teheranin për dështimin e marrëveshjes së armëpushimit

Nënpresidenti i Shteteve të Bashkuara, JD Vance, ka thënë se Uashingtoni beson që lideri suprem i Iranit është ende gjallë, por nuk është i përfshirë në punët e përditshme të vendit. Në një intervistë me gazetarin Vince Coglianese, siç njofton Al Jazeera, Vance pranoi se nuk e di me siguri. “Ne mendojmë se është gjallë. Nuk e dimë, sigurisht,” tha ai. “Nuk e kam parë kurrë. Nuk e kam parë në kamera kohët e fundit. Provat më të mira që kemi sugjerojnë se është gjallë.”

I pyetur se kush është në krye brenda Iranit, Vance e përshkroi sistemin e udhëheqjes iraniane si “shumë të hutuar”. “Mund t’ju jap një përgjigje. Do të ishte në rastin më të mirë një hamendje, sepse ke një sërë grupimesh të ndryshme. Ke linjën e ashpër, ke konservatorët, ke moderatët, ke klerikët dhe të gjithë këta njerëz janë të përfshirë në procesin e vendimmarrjes,” tha nënkryetari amerikan. “Dhe pastaj sigurisht ke liderin e ri suprem, i cili është shumë i shkëputur. Nuk është i përfshirë ditë për ditë; nuk del në emisionet e së dielës në Amerikë për të folur për këto negociata.”

Vance fajësoi drejtpërdrejt udhëheqësit iranianë për dështimin e memorandumit të mirëkuptimit të nënshkruar në qershor, duke thënë se ata “e prishën” duke vendosur të sulmonin anijet tregtare në ujërat rajonale. “Mendoj se iranianët e kuptojnë se e prishën, se nënshkruan një marrëveshje me ne, kishim një armëpushim, çmimet e energjisë kishin rënë dhe kishim mundësinë … që nëse iranianët silleshin mirë, do të përfitonin shumë nga një marrëdhënie më e mirë me Shtetet e Bashkuara,” tha ai. “Por çfarë ndodhi? Nuk u sollën mirë. Nisën të gjuanin ndaj anijeve tregtare.”

Deklaratat vijnë ndërsa SHBA-ja dhe Irani vazhdojnë bisedimet indirekte përmes ndërmjetësve për t’i dhënë fund luftës shtatë-mujore, me Teheranin që pret përgjigjen e Uashingtonit për propozimin e ri për rihapjen e Ngushticës së Hormuzit.