Tre të arrestuar për sulmet e koordinuara me bomba artizanale që tronditën Selanikun! Zbulohen detajet

Pas hetimeve dhjetëditore, Shërbimi Antiterror i Greqisë ka arrestuar tre persona për sulmet e koordinuara me bomba artizanale të gazit që tronditën Selanikun në 1 korrik.

Operacioni u zhvillua njëkohësisht në Selanik dhe Kretë, ndërsa vijojnë kontrollet në banesa dhe ambiente të tjera.
Sipas autoriteteve, një 29-vjeçar u arrestua në Selanik dhe një 26-vjeçare në Hania të Kretës, të dy të njohur më parë nga policia për aktivitet në qarqet anarkiste.

Personi i tretë dyshohet se u vuri në dispozicion apartamentin e tij, i cili, sipas hetimeve, u përdor si bazë për përgatitjen dhe ekzekutimin e sulmit ndaj banesës së Afroditi Nestorës.

Hetimet tregojnë se 26-vjeçarja dhe 29-vjeçari mbërritën në apartament një ditë para sulmit, qëndruan aty deri në momentin kur vendosën mekanizmin shpërthyes dhe, pas shpërthimit, u kthyen sërish për të ndërruar rrobat, përpara se të largoheshin.

Policia vlerëson se sulmet janë kryer nga dy grupe të ndryshme dhe autorët e sulmit tjetër mbeten ende të paidentifikuar. Autoritetet shpresojnë se analizimi i telefonave celularë të të arrestuarve do të çojë edhe në identifikimin e pjesëtarëve të grupit të dytë.

Ngjarja në fjalë kishte tronditur opinionin publik grek. Tre sulme të koordinuara me bomba artizanale gazi kishin në shënjestër banesat e tre drejtuesve lokalë të partisë në pushtet, Demokracia e Re, në Selanik.

Sulmi më i rëndë ndodhi në banesën e Afroditi Nestorës ku pas shpërthimit të mekanizmit artizanal tek automjeti i saj zjarri i fuqishëm dhe tymi përfshiu të gjithë godinën. Si pasoje humbi jetën nëna e ish kandidates për deputete të Demokracisë së Re , ndërsa u plagosën edhe katër persona të tjerë.

Dy sulmet e tjera kishin në shënjestër banesat e kryetarit të Demokracisë së Re në Selanik, Zisis Ioakeimovits, dhe ish-deputetit Savvas Anastasiadis, duke shkaktuar dëme materiale.

Kryeministri Kyriakos Mitsotakis e kishte cilësuar sulmin një akt terrorist, duke premtuar se autorët do të identifikoheshin dhe do të viheshin përpara drejtësisë