Triumfon Shqipëria e rrjetës

Shqipëria në volejboll për meshkuj rikthehet tek fitorja pas katër vitesh mungesë. Gjithçka ndodh me djemtë e Jani Melkës, të cilët në mbrëmjen e së dielës triumfuan, 3-1 ndaj Rumanisë. Anton Qafarena, Raul Sabliqi, Leonardo Doda, Muharrem Deliu, Osman Qepa, Norgen Baruti, Xhulio Lumani Regis Shehi, Aldo Kupi, Ledion Martiro, Emanuel Driza, Santiel Kamenica, Krist Martiro dhe Gersi Jula u bënë të gjithë bashkë rreth trajnerit Jani Melka për të sjellë këtë triumf që i mungonte volejbollit shqiptar.

Një fitore që është si “kapak floriri” në këtë fund të Ligës së Europës, që numron në total një sukses dhe pesë humbje. Dominohen dy setet e para, të cilat Shqipëria i fiton 25-23 dhe 25-19. Stanciu ndërron krejtësisht formacionin, forcon bllokun dhe merr setin e tretë 25-17. I katërti nuk ka më dyshime, 25-16 dhe 3-1 për Shqipërinë, ndërsa festa është e madhe në kampin kuqezi.

Por nëse fituan djemtë, kjo gjë nuk ndodhi me vajzat, të cilat në ndeshjen e gjashtë u mundën 0-3 nga Suedia. Nordiket me Izabela Hak dominuan gjithçka, ndërsa fituan 8-25, 9-25 dhe 15-25. E në këtë mënyrë i erdhi fundi Ligë së Europës në një transmetim maratonë në rrjetin e Radio Televizionit Shqiptar nga salla olimpike “Feti Borova”. Në tërësi triumfi i djemve i bën nder rrjetës shqiptare për t’u rritur në nivel ndërkombëtar.