Tronditet Kosova, babai vret djalin, gruan dhe veten

Një ngjarje e rëndë ka ndodhur në Lipjan të Kosovës, pasi tre persona janë gjetur të vdekur. Ngjarja ka ndodhur në fshatin Rufc rreth orës 16:30. Dyshimet paraprake janë se babai ka vrarë djalin, gruan e tij e më pas edhe veten.

Lajmin e ka konfirmuar zëdhënësja e policisë për rajonin e Prishtinës, Flora Ahmeti.

“Rreth orës 16:30 policia ka pranuar informatën për tre persona të pajetë në fshatin Rufc të Lipjanit.

Menjëherë pas marrjes së informatës policia ka dalë në vendin e ngjarjes ku janë hasur tre trupa të pajetë, vdekja e të cilëve është konstatuar nga ana e ekipit mjekësor”, tha ajo.

Më tej ajo shtoi se policia ka nisur një hetim për rastin dhe rrethanat që karakterizojnë ngjarjen. Nuk dihen ende rrethanat e vrasjes së rëndë.

Duket se ka qenë grindja e çastit mes bashkëshortëve e më pas ndërhyrja e djalit, që përfundoi në një tragjedi. 60-vjeçari Abedin Bekteshi ka vrarë bashkëshorten e tij dhe djalin Ardit Bekteshin 24-vjeç e më pas ka vrarë veten.