Trump: Ngushtica e Hormuzit është hapur pjesërisht, do të hapet plotësisht të premten

Presidenti amerikan, Donald Trump tha të hënën se Ngushtica e Hormuzit është tashmë pjesërisht e hapur dhe se do të hapet plotësisht të premten, kur SHBA-të dhe Irani do të nënshkruajnë zyrtarisht një memorandum mirëkuptimi në Zvicër.

“Ata po bëjnë një kërkim të vogël për disa mina që i kanë gjetur tashmë, por… anijet kanë filluar të dalin tani”, tha Trump gjatë një takimi me presidentin Francez Emmanuel Macron në samitin e G7.

“Të premten, do të jetë plotësisht e hapur”, shtoi ai.

Trump ndër të tjera theksoi se ngushtica do të rihapej pa pasur nevojë për shumë ndihmë nga Franca.

“Nuk mendoj se do të na duhet shumë ndihmë, sepse kemi një marrëveshje ku do të jetë e hapur dhe pa pagesë. Patëm një debat të vogël për këtë; është pa pagesë”, tha ai.

“Nuk mendoj se është ide e keqe të kemi një ose dy anije këtu nga disa vende”, theksoi Trump.