Trump pret rinovimin e bombardimeve ndaj Iranit në nëntor — Pentagoni dërgon aeroplanmbajtësen e tretë dhe 10,000 trupa shtesë në Lindjen e Mesme

Pentagoni po dërgon një grup të tretë goditës aeroplanmbajtësesh dhe anije shtesë të Korpusit të Marinsave në Lindjen e Mesme, duke shtuar 9,000 deri në 10,000 trupa të tjerë në rajon, ndërsa presidenti Donald Trump po shqyrton rinisjen e sulmeve ndaj Iranit pas zgjedhjeve afatmesme, sipas raportimit të Wall Street Journal. Trump u ka thënë kohët e fundit ndihmësve se pret të rinovojë bombardimet ndaj Iranit në të njëjtin muaj, raporton gazeta amerikane.

Aeroplanmbajtësja USS Theodore Roosevelt u nis të dielën nga porti i saj në San Diego në një dislokim të planifikuar, ndërsa Grupi Amfib i Gatishmërisë USS Makin Island, i përbërë nga tre anije amfibe që mbartin marinsa të Njësisë së 13-të Ekspeditare të Marinsave, u nis të hënën. Anijet, avionët luftarakë, marinsat dhe marinarët pritet të mbërrijnë në rajon deri në fund të nëntorit, sipas zyrtarëve amerikanë.

Dy aeroplanmbajtëse — USS George H.W. Bush dhe USS George Washington — ndodhen tashmë në Lindjen e Mesme. Nëse Washington-i qëndron në rajon pas mbërritjes së Roosevelt-it, kjo do ta çonte numrin në tre grupe goditëse aeroplanmbajtësesh për herë të parë që nga prilli, përpara se Irani dhe SHBA-ja të arrinin armëpushimin e brishtë që i dha fund përkohësisht luftimeve të nisura më 28 shkurt. Së bashku me anijet e Grupit Amfib të Gatishmërisë USS Boxer, të cilat ndodhen gjithashtu në rajon, forcat amerikane në Lindjen e Mesme mund të arrijnë një përqendrim të pazakontë prej më shumë se 20,000 marinarësh e marinsash dhe qindra avionësh.

Vendimi vjen në një moment tensionesh të larta: sipas New York Post, e cila citon raportimin e Wall Street Journal, Pentagoni ka planifikuar që Roosevelt të jetë gati për një qëndrim të gjatë, pasi sulmet iraniane kanë prishur linjat e furnizimit në rajon, përfshirë një port kyç në Bahrein, duke shkaktuar mungesa kritike furnizimesh për marinarët. Trupat shtesë do t’i shtohen më shumë se 50,000 ushtarëve amerikanë që ndodhen tashmë në rajon, tha një zyrtar.

Megjithatë, mbetet e mundur që Washington-i të largohet nga rajoni dhe të kthehet në portin e saj në Japoni, gjë që do ta kthente forcën sërish në dy aeroplanmbajtëse. Zëdhënësit e Shtëpisë së Bardhë dhe Pentagonit nuk iu përgjigjën kërkesave për koment, raporton Wall Street Journal.