Turistët e huaj do të paguajnë për shërbimin në qendrat shëndetësore verore

Turistët e huaj që do të frekuentojnë 36 qendrat shëndetësore verore do ta marrin shërbimin kundrejt pagesës.

Lajmin për nisjen e zbatimit të një kuadri të ri të unifikuar për regjistrimin, trajtimin, tarifimin dhe dokumentimin e shërbimeve shëndetësore të ofruara për të huajt në institucionet shëndetësore publike e bëri të ditur vetë ministrja e Shëndetësisë, Evis Sala.

Gjatë inspektimit në Qendrën Shëndetësore Verore të Pogradecit, ajo theksoi se për herë të parë vendosen rregulla të qarta dhe transparente për ofrimin e shërbimeve ndaj turistëve të huaj, me tarifa të publikuara paraprakisht dhe të bazuara në legjislacionin në fuqi.

“Ky urdhër vendos për herë të parë një kuadër të unifikuar për regjistrimin, trajtimin, tarifimin dhe dokumentimin e shërbimeve shëndetësore të ofruara për shtetasit e huaj në institucionet shëndetësore publike. Sistemi i ri garanton transparencë, trajtim të barabartë dhe respektim të të drejtave të pacientëve”, është shprehur ministrja Sala.

Kuadri i ri përcakton kategoritë e shtetasve të huaj që përfitojnë shërbime falas, rregullat e aplikimit të tarifave për shtetasit jo-rezidentë, procedurat për rastet e mbuluara nga marrëveshjet ndërkombëtare, si dhe detyrimin për publikimin paraprak të tarifave, informimin e pacientit mbi kostot e trajtimit dhe lëshimin e dokumentacionit financiar përkatës, ndërsa të ardhurat e gjeneruara nga tarifat do të përdoren për përmirësimin e cilësisë së shërbimeve dhe forcimin e kapaciteteve të institucioneve shëndetësore publike.