Aksion arrestimesh në Novi Sad: grupi dyshohet se planifikonte trazira në Beograd në ditën e zgjedhjeve

Një aksion arrestimesh është në vijim e sipër në territorin e Novi Sadit kundër një grupi që dyshohet se planifikonte trazira në Beograd në ditën e zgjedhjeve parlamentare, 25 tetor, njofton agjencia Tanjug, ndërsa zhvillimin e ka raportuar edhe Radio-Televizioni i Serbisë (RTS). Aksionin po e zbatojnë Prokuroria e Lartë Publike në Beograd dhe Njësia Speciale Antiterroriste (SAJ), ndërsa paralelisht po kryhen bastisje të objekteve dhe hapësirave që përdornin personat e dyshuar.

Sipas informacioneve të Tanjug-ut, dyshohet se grupi kishte planifikuar të vinte në Beograd në mënyrë të organizuar me rreth 80 burra, me qëllim që të shkaktonte trazira në rrugët e kryeqytetit në ditën e zgjedhjeve. Plani i dyshuar, siç njofton agjencia, përfshinte djegien e automjeteve, sulme ndaj qytetarëve, grabitje parash dhe hedhjen e koktejeve të Molotovit nga skuterët, si edhe përplasje të drejtpërdrejta me policinë.

Deri në këto momente organet kompetente nuk kanë dalë me të dhëna zyrtare për numrin e personave të arrestuar, as për rezultatet e bastisjeve. Siç raporton BBC-ja në gjuhën serbe, portali i Novi Sadit 021 nuk ka arritur të marrë konfirmim për arrestimet nga institucionet, ndërsa Ministria e Punëve të Brendshme e Serbisë ende nuk është prononcuar për aksionin.

Në një aksion të veçantë, me urdhër të Prokurorisë së Lartë Publike në Kralevë, policia ka arrestuar M.A. nga Vrnjaçka Banja, me dyshimin se ka bërë thirrje për ndryshim të dhunshëm të rendit kushtetues dhe se ka planifikuar të marrë pjesë në trazirat në Beograd në ditën e zgjedhjeve, njofton Tanjug-u. Para arrestimit, policia ka bastisur objektet dhe automjetet që përdorte i dyshuari.

Arrestimet ndodhin katër ditë para zgjedhjeve të parakohshme parlamentare të 25 tetorit, në një fushatë të shoqëruar me tensione të larta mes pushtetit dhe opozitës studentore. Më shumë detaje priten pas prononcimit të organeve kompetente.