U aksidentua për vdekje në Pogradec, policia: 32-vjeçari po arratisej me makinën që kishte vjedhur

Amarildo Islamaj, 32-vjeçari nga Vlora i cili ditën e djeshme humbi jetën për shkak të një aksidenti automobilistik në afërsi të fshatit Pojskë në Pogradec, duket se makinën me të cilën u aksidentua e kishte vjedhur pak minuta më parë.

Sipas policisë, 32-vjeçari kishte shkuar në fshatin Leshnicë, aty ku vodhi mjetin dhe më pas hoqi targat shqiptare dhe vendosi targa polake.

Pavarësisht se nuk ka qenë në ndjekje nga policia, 32-vjeçari ishte duke udhëtuar me shpejtësi të lartë për t’u larguar sa më parë nga Pogradeci, ku në një moment humbi kontrollin e mjetit dhe u aksidentua për vdekje.

Policia ka mundur ta mësojë këtë për shkak të denoncimit të pronarit të mjetit, por edhe për shkak të deklaratës që ka dhënë një tjetër person që shoqëronte Amarildon, i cili gjithashtu mbeti i plagosur në aksident.