UASHINGTON – Trump: Ose marrëveshje me Iranin, ose SHBA-ja do ta zgjidhë me forcë

– Presidenti amerikan, Donald Trump deklaroi sot se Shtetet e Bashkuara të Amerikës ose do të arrijnë një marrëveshje me Iranin, ose “do ta zgjidhin me forcë”, duke përsëritur kërcënimet për veprime ushtarake, ndërsa Teherani po shfaq rezistencë pas funeralit të Liderit Suprem, Ajatollah Ali Khamenei, raportoi “Reuters”.

Bisedimet indirekte SHBA–Iran përfunduan javën e kaluar, pa ndonjë shenjë për përparim drejt një paqeje të qëndrueshme, pavarësisht një armëpushimi 60-ditor, që synonte t’i jepte hapësirë diplomacisë, pas sulmeve amerikane dhe izraelite që ndezën konfliktin.

“Ne ose do të bëjmë një marrëveshje, ose do ta zgjidhim me forcë. OK. Dhe nuk do të jetë e vështirë ta përfundojmë. Do të preferoja një marrëveshje, sepse nuk dua të prek 91 milionë njerëz”, tha Trump për gazetarët në Zyrën Ovale.

“Ne mund t’u rrëzojmë urat për një orë, mund t’u godasim furnizimin me energji… Ata nuk kanë më para. Ne nuk u kemi dhënë më para”, shtoi ai.

Trump foli pas funeralit të Khameneit, ku, në vend që të dukeshin të dobësuar nga lufta, që filloi me sulmet amerikane dhe izraelite, më 28 shkurt, iranianët u shfaqën sfidues, të bashkuar dhe të vendosur në zhvillimet e ardhshme pas këtij konflikti.

Armëpushimi 60-ditor ishte menduar nga Uashingtoni, për të rivendosur diplomacinë mbi ndalimin e ndërtimit të armëve bërthamore nga Irani. /