Ukraina thotë se goditi rafinerinë më të madhe të naftës në Omsk të Siberisë, rreth 2.500 km nga Ukraina
Sipas ushtrisë ukrainase, objekti i operuar nga Gazpromneft në qytetin siberian të Omskit u godit të enjten; e njëjta rafineri kishte ndalur operacionet pas sulmit të korrikut.
Ushtria e Ukrainës njoftoi të enjten se ka goditur rafinerinë më të madhe të naftës në Rusi, që ndodhet rreth 2.500 kilometra nga Ukraina, thellë në Siberi, siç njofton Reuters.
Bëhet fjalë për rafinerinë e Omskit, e cila operohet nga Gazpromneft. E njëjta rafineri ishte sulmuar edhe në korrik, dhe pas atij sulmi kishte qenë e detyruar të ndalonte operacionet.
Shtabi i Përgjithshëm i Ukrainës nuk dha detaje mbi pasojat e sulmit në deklaratën e tij në rrjetet sociale, por theksoi se rafineria furnizonte me karburant ushtrinë ruse.
Guvernatori i rajonit të Omskit, Vitali Khotsenko, tha se një zonë industriale ishte goditur nga një dron, pa dhënë hollësi të tjera.
Sulmi është pjesë e fushatës së sulmeve me dronë në distanca të gjata që Ukraina po zhvillon kundër objektivave ushtarakë, energjetikë dhe tregtarë në Rusi, ndërkohë që vetë përballet me sulme të rënda raketore dhe me dronë nga Moska — një përpjekje për t’i rritur kostot e vazhdimit të luftës.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.