UKRAINË – Zelensky: Rusia po përgatit një sulm masiv të ri

KIEV, 6 tetor /ATSH-DPA/ – Presidenti ukrainas Volodymyr Zelensky paralajmëroi sot në mbrëmje se Rusia po përgatit një sulm të ri të madh ndaj Ukrainës, duke iu referuar informacioneve të reja të zbulimit.

“Kemi informacione të përditësuara të zbulimit se rusët po përgatitin një sulm masiv. Ju lutem, ju përgjërohem, kujdesuni për veten”, tha Zelensky në fjalimin e tij të mbrëmjes të transmetuar me video.

Ai u bëri thirrje ukrainasve që t’u kushtojnë vëmendje paralajmërimeve për sulme me raketa dhe të kërkojnë strehim sapo të aktivizohen alarmet.

“Forcat e sigurisë së Ukrainës dhe forcat tona ajrore janë të gatshme të përgjigjen, aq sa na lejojnë kapacitetet tona mbrojtëse”, tha Zelensky, duke iu referuar mungesës së armëve të mbrojtjes ajrore.

Udhëheqësi ukrainas e shoqëroi paralajmërimin me një apel të ri ndaj aleatëve perëndimorë për sisteme shtesë të mbrojtjes ajrore.

“Shumë gjëra varen nga partnerët, nga çdo lider, nga çdo shtet në botë që ka mjetet e mbrojtjes që na nevojiten dhe që mund t’i transferojë ato”, tha Zelensky.

“Bota është më e madhe se e keqja ruse dhe mbrojtja e jetëve duhet të jetë një detyrë e përbashkët”, shtoi ai.

Sipas raportimit, Rusia ka shtuar sulmet ndaj qyteteve ukrainase dhe qendrave të tjera të banuara, duke shfrytëzuar dobësitë e mbrojtjes ajrore të Ukrainës.

Forcat ukrainase të mbrojtjes ajrore po përballen me mungesa municionesh, veçanërisht për sistemet që janë në gjendje të kapin raketat balistike./ /Ad.Ab./ a.jor.