Vdekje e dyshimtë në Gjilan, foshnja dy muajshe ndërron jetë në emergjencë dhe trupi dërgohet për obduksion

Një foshnjë dy muajshe ka ndërruar jetë në Gjilan, pasi ishte sjellë për trajtim mjekësor në emergjencën e spitalit të qytetit, raporton “Betimi për Drejtësi” duke iu referuar raportit 24-orësh të Policisë së Kosovës.

Sipas raportit policor, rasti është regjistruar më 14 tetor, rreth orës 12:15, kur emergjenca e spitalit ka njoftuar se foshnja ishte sjellë për tretman mjekësor, por më pas kishte ndërruar jetë. Vdekjen e foshnjës e ka konstatuar ekipi mjekësor.

Policia e ka cilësuar rastin si vdekje të dyshimtë dhe ka nisur hetimet për sqarimin e rrethanave. Deri më tani nuk është bërë i ditur shkaku i vdekjes.

Me vendim të prokurorit, trupi i pajetë i foshnjës është dërguar në Institutin e Mjekësisë Ligjore (IML) për obduksion, rezultatet e të cilit pritet të ndihmojnë në përcaktimin e shkakut të vdekjes, njofton edhe Gazeta Shneta.