Rama në konferencë: Lojërat Mesdhetare 2030 në rrezik, bordi nuk është mbledhur që nga 14 gushti

Kryetari i Prishtinës, Përparim Rama, paralajmëroi në konferencën e sotme për media se organizimi i Lojërave Mesdhetare “Prishtina 2030” është në rrezik, duke kritikuar Qeverinë e Kosovës për vonesa në përmbushjen e detyrimeve financiare dhe organizative, siç raporton Gazeta Sportal duke iu referuar Teve1.

Sipas Ramës, Komiteti Ndërkombëtar i Lojërave Mesdhetare (ICMG) ka dërguar më 15 tetor një letër zyrtare ku shpreh shqetësime për ngecjet në procesin përgatitor. Në letër theksohet se disa detyrime kanë mbetur të papërmbushura, përfshirë dorëzimin e garancisë bankare dhe pagesat financiare.

Rama tha se më 19 dhjetor 2026 do të shqyrtohet e ardhmja e organizimit të Lojërave në Prishtinë dhe kërkoi veprime urgjente nga institucionet përgjegjëse. Ai e kritikoi kryeministrin Albin Kurti, njëherësh kryesues i bordit drejtues, për mosthirrjen e mbledhjeve të bordit pas 14 gushtit, duke shtuar se kërkesa e kryeqytetit për mbledhje të jashtëzakonshme më 8 tetor nuk u realizua, pasi nuk u siguruan nënshkrimet e nevojshme nga përfaqësuesit e institucioneve të tjera.

Kreu i Prishtinës tha se komuna ka përmbushur një pjesë të përgjegjësive të saj, duke përmendur miratimin e statusit të komitetit organizativ, regjistrimin e organizatës dhe propozimin e pesë porteve urbane, të cilat, sipas tij, janë miratuar nga ICMG-ja në qershor. Ai shtoi se janë paraqitur edhe propozimet për lokacionet sportive.

Rama ngriti edhe çështjen e mospajtimeve me Qeverinë për emërtimin e ngjarjes, duke pretenduar se kërkesa e Kurtit për ndryshimin e emrit nga “Prishtina 2030” në “Kosova 2030”, si dhe insistimi që kryeministri ta drejtojë bordin, kanë ndikuar në procesin përgatitor. “Jemi në rrezik t’i humbim Lojërat Mesdhetare”, deklaroi Rama, duke kërkuar përgjegjësi institucionale dhe koordinim të menjëhershëm.