VIDEO/ Të armatosur dhe me çekiç në dorë, ja momenti kur autorët grabisin argjendarinë në Kamëz

Pamjet e grabitjes së armatosur të ndodhur një ditë më parë në Kamëz janë bërë publike, ku një argjendari u sulmua nga dy persona të armatosur.

Sipas pamjeve, autorët kanë hyrë me shpejtësi në ambientet e biznesit dhe, nën kërcënimin e armëve që mbanin në dorë, kanë thyer xhamat e vitrinave ku ndodheshin bizhuteritë. Më pas, ata janë larguar me shpejtësi me një motor, ndërsa policia i ka shpallur në kërkim.

Grabitja ka zgjatur më pak se një minutë. Autorët kanë qenë të maskuar gjatë gjithë kohës, çka e bën të vështirë identifikimin e tyre. Kamerat e sigurisë kanë regjistruar lëvizjet e tyre deri në zonën e Zall-Herrit, ku dyshohet se kanë vijuar arratisjen.

Në një moment, gjatë largimit, ata kanë humbur kontrollin e motorit dhe janë rrëzuar, por kanë arritur të vijojnë arratisjen. Deri tani, policia ka mundur të përcaktojë vetëm drejtimin e largimit të tyre.

Nga ana tjetër, janë shoqëruar disa persona me precedentë penalë për verifikim, por më pas janë lënë të lirë pasi nuk janë gjetur lidhje me ngjarjen.

Sipas burimeve paraprake, vlera e sendeve të arit dhe argjendit të marra arrin deri në 7 milionë lekë të vjetra. Punonjësja e argjendarisë ka deklaruar se në momentin e grabitjes nuk ka qenë në pjesën e përparme të dyqanit, por në ambientet e pasme, ndaj nuk është përballur drejtpërdrejt me autorët.

Pamjet tregojnë gjithashtu një prej grabitësve të armatosur që qëndron jashtë duke bërë roje, ndërsa tjetri brenda mbledh sende me shpejtësi dhe largohet me një çantë të mbushur.

A post shared by Euronews Albania (@euronews_albania)