VLEN pas vendimit të Hagës: UÇK-ja zhvilloi luftë të drejtë dhe çlirimtare; BDI-ja po e shfrytëzon politikisht

Shkup, 27 shtator – Koalicioni VLEN ka reaguar pas vendimit të Dhomave të Specializuara të Hagës ndaj ish-udhëheqjes së Ushtrisë Çlirimtare të Kosovës – Hashim Thaçit, Kadri Veselit, Jakup Krasniqit dhe Rexhep Selimit, siç njofton portali 48chasa, duke shprehur zhgënjimin me vendimin e marrë nga Gjykata Speciale.

VLEN thekson se vendimi nuk ndryshon aspak qëndrimin e tyre: lufta e UÇK-së ishte, siç e cilëson koalicioni, “luftë e drejtë dhe çlirimtare” kundër regjimit të Sllobodan Millosheviçit.

Njëkohësisht, VLEN kritikon ashpër BDI-në dhe liderin e saj, Ali Ahmetin, duke i akuzuar se po e përdorin vendimin e Hagës dhe marshin e paralajmëruar për qëllime politike. “UÇK-ja nuk është pronë e BDI-së dhe nuk mund të përdoret si alibi për të larë mëkatet”, thuhet në reagimin e koalicionit, të cituar nga 48chasa.

VLEN kërkon që BDI-ja dhe Ahmeti t’u përgjigjen disa pyetjeve kyçe: çfarë marrëveshjeje ishte ofruar në këmbim të mbështetjes për themelimin e Dhomave të Specializuara; çfarë përmban dosja e lidhur me dëshminë e Ahmetit; pse Ahmeti e ka përshkruar ndryshe rolin e tij para Dhomave të Specializuara; dhe nëse dëshmia e tij pati ndonjë rol në aktakuzën ndaj ish-udhëheqjes së UÇK-së.

Sipas VLEN-it, në vend të protestave politike, publiku duhet të marrë përgjigje për këto pyetje.