“Nuk e kam takuar kurrë”, gruaja tërheq akuzat për abuzim ndaj Jay-Z

Gruaja që akuzoi Jay-Z për abuzim seksual kur ishte vetëm 13 vjeçe ka tërhequr akuzat ndaj reperit dhe i ka kërkuar falje atij dhe familjes së tij për “dhimbjen e madhe” që u ka shkaktuar.

Në një deklaratë të dorëzuar në gjykatën federale në Manhattan, gruaja, e identifikuar si Jane Doe, deklaroi se Jay-Z, emri i vërtetë i të cilit është Shawn Carter, nuk e ka përdhunuar kurrë dhe se ajo nuk e ka takuar apo folur me të.

“Shawn ‘Jay-Z’ Carter nuk më ka përdhunuar kurrë. Unë nuk e kam takuar dhe as nuk kam folur ndonjëherë me zotin Carter”, thuhet në deklaratë.

Ajo shtoi se reperi nuk kishte kryer “asnjë sjellje të papërshtatshme” ndaj saj.

“Nuk ka asnjë të vërtetë në asnjë prej pretendimeve të mia ndaj zotit Carter. E kuptoj se akuzat e mia të rreme i kanë shkaktuar atij dhimbje, vuajtje dhe dëme që nuk mund të zhbëhen kurrë plotësisht”, u shpreh gruaja.

Ajo i kërkoi gjithashtu falje “sinqerisht dhe pa kushte” Jay-Z për dëmin që pretendon se i ka shkaktuar atij, familjes së tij dhe reputacionit të tij, përfshirë bashkëshorten Beyoncé.

Avokati i saj aktual, J. Blair Newman, tha se klientja e tij vazhdon të pretendojë se ka qenë viktimë e një sulmi seksual, por se ishte “tërësisht e gabuar” kur identifikoi Jay-Z si një prej personave që e kishin sulmuar.

“Zoti Carter nuk e ka përdhunuar, nuk e ka sulmuar seksualisht dhe nuk ka kryer asnjë sjellje të papërshtatshme ndaj saj. Ajo nuk e ka takuar kurrë”, tha Newman.

Si nisën akuzat ndaj Jay-Z?

Në vitin 2024, gruaja ngriti një padi ku pretendonte se Jay-Z dhe Sean “Diddy” Combs e kishin përdhunuar në një festë pas MTV Video Music Awards në vitin 2000, kur ajo ishte 13 vjeçe.

Fillimisht, padia ishte ngritur ndaj Combs, por më vonë Jay-Z u shtua si i pandehur.

Jay-Z i mohoi menjëherë akuzat dhe foli publikisht për ndikimin që ato kishin pasur te familja e tij.

Në shkurt të vitit 2025, gruaja e tërhoqi padinë dhe çështja u mbyll.

Më vonë, Page Six raportoi se ajo ishte dëgjuar në një regjistrim duke u thënë hetuesve privatë se Jay-Z nuk e kishte përdhunuar. Në të njëjtën kohë, ajo pretendonte se avokati i saj i atëhershëm, Tony Buzbee, e kishte shtyrë të ngrinte akuzat ndaj reperit.

Jay-Z më pas ndërmori veprime ligjore ndaj saj dhe Buzbee, duke i akuzuar për ndjekje dashakeqe të çështjes, abuzim me procesin gjyqësor dhe shpifje.

Në deklaratën e re, gruaja mohoi se ishte kërcënuar apo detyruar të tërhiqte akuzat. Ajo tha gjithashtu se nuk kishte marrë dhe nuk i ishte premtuar asnjë pagesë nga Jay-Z apo dikush në emër të tij.

Sipas saj, gjithçka nisi pasi kishte parë një reklamë në Facebook që kërkonte persona që mund të kishin pretendime për sulme seksuale në lidhje me Sean “Diddy” Combs.

Reklama, sipas saj, i riktheu kujtime për një sulm seksual që pretendon se kishte përjetuar kur ishte 13 vjeçe dhe më pas ajo kontaktoi një studio ligjore.

Megjithatë, gjatë procesit ajo nisi të dyshonte në kujtimet e veta dhe nëse kishte qenë apo jo në festën ku pretendonte se kishte ndodhur sulmi.

Ajo kishte pranuar më herët edhe disa mospërputhje në rrëfimin e saj. Në një intervistë për NBC News në dhjetor 2024, gruaja pranoi se disa detaje të historisë së saj nuk mundën të konfirmoheshin.

Ndër të tjera, ajo kishte pretenduar se kishte folur me muzikantin Benji Madden në festë. Përfaqësuesi i tij tha se ai dhe vëllai i tij binjak, Joel Madden, ndodheshin në turne në Midwest në atë periudhë.