Vrau ish-vjehrrin dhe mori peng me forcë ish-gruan, kush është autori i ngjarjes në Roskovec

Ky është autori i ngjarjes së rëndë kriminale që ka tronditur mëngjesin e sotëm fshatin Vidhisht të bashkisë Roskovec.

Ngjarja e rëndë me autor Refiz Buzin ka përfunduar me një viktimë, një të plagosur dhe një person të dyshuar të marrë peng.

Si pasojë e të shtënave, ka humbur jetën në vendngjarje ish-vjehrri i tij, Kosta Plaka, 58 vjeç, dhe është plagosur ish-vjehrra. 55-vjeçarja është transportuar në spital dhe ndodhet nën kujdesin e stafit mjekësor.

Autori dyshohet se është larguar nga vendi i krimit me një automjet, duke marrë me vete kundër dëshirës së saj ish-bashkëshorten. Autori raportohet se ka marrë me vete edhe armën e gjahut të përdorur në krim.

Në zonë dhe në akset kryesore rrugore janë ngritur pika të shumta kontrolli dhe po zhvillohet një operacion intensiv kërkimi për lokalizimin dhe arrestimin e 35-vjeçarit.

Në vendin e ngjarjes, grupi hetimor po kryen ekspertizën dhe mbledhjen e provave materiale për zbardhjen e plotë të motiveve dhe dokumentimin ligjor të kësaj ngjarjeje.