Vrau Petrit Vuksanin, arrestohet pas 21 orësh ndjekje autori! Sekuestrohet automatiku me të cilin kreu krimin

Policia ka gjetur dhe sekuestruar një armë zjarri automatik, me të cilën dyshohet se 34-vjeçari vrau Petrit Vuksanin.

51-vjeçari mbeti i vrarë me armë zjarri mesditën e së martës, në qytetin e Shkodrës. Ngjarja ndodhi në lagjen “Skenderbeg” dhe viktima ishte i vetëm në shtëpi kur autori i dyshuar, Leke Vuksani, është futur në banesë dhe e ka qëlluar duke e lënë të vdekur.

Shkaku i ngjarjes mes dy personave nga Dukagjini, me të njëjtin mbiemër por që nuk kanë lidhje familjare, dyshohet se është një konflikt për paratë e qerasë së banesës.

Petrit Vuksani, jetonte mes Italisë dhe Shqipërisë, dhe prej një muaji ishte kthyer në vendlindjen e tij. Banesën në lagjen “Skenderbeg” ia kishte lëshuar me qira, personit që dyshohet se i mori jetën, Lekë Vuksanit.

Ai i ka kërkuar autorit paratë e qirasë së disa muajve, dhe tja lirojë banesën, por ky i fundit ka debatuar me të.

Pas konfliktit të vazhdueshëm, Lekë Vuksani është larguar nga shtëpia, duke u rikthyer me një arme zjarri. Autori i dyshuar është futur në banese dhe e ka gjetur të vetëm qiradhënësin, duke e qëlluar për vdekje.

Policia thotë se grupi hetimor, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Shkodër, vijon punën për dokumentimin e plotë ligjor të këtij rasti.

“Pas 21 orësh kërkime dhe ndjekje, lokalizohet, kapet dhe vihet në pranga autori i dyshuar i vrasjes së kryer mesditën e djeshme, në lagjen “Tom Kola”. Gjendet dhe sekuestrohet arma e zjarrit automatik me të cilën dyshohet se u krye vrasja.

34-vjeçari u lokalizua në një banesë në rrugën “Pjetër Budi”, Shkodër, ku ishte strehuar pasi kishte kërcënuar pronaren e kësaj banese. Strukturat operacionale të DVP Shkodër dhe ato të Komisariatit të Policisë Shkodër, në bashkëpunim me Forcën Speciale RENEA, pasi 21 orësh, si rezultat i kërkimeve dhe ndjekjes së pandërprerë policore, me mbështetjen e informacioneve të siguruara nga inteligjenca informative, kanë bërë të mundur lokalizimin, kapjen dhe vënien në pranga të shtetasit L. V., 34 vjeç, banues në Shkodër.

34-vjeçari u lokalizua në banesën e një shtetaseje, në rrugën “Pjetër Budi”, Shkodër, banesë në të cilën kishte mundur të strehohej pasi gjatë natës kishte kërcënuar pronaren e kësaj banese për t’i hapur derën dhe për të mos kallëzuar.

Gjithashtu, në të njëjtën banesë, u gjet edhe arma e zjarrit automatik me të cilën dyshohet se autori kreu vrasjen. Shtetasi L. V. dyshohet se rreth orës 12:15, të ditës së djeshme, në lagjen “Tom Kola”, vrau me armë zjarri automatik, në banesë, shtetasin P. V., 51 vjeç. Grupi hetimor, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Shkodër, vijon punën për dokumentimin e plotë ligjor të këtij rasti.”- njofton policia.