Xi i drejtohet Trumpit: Putini mund të pendohet për pushtimin e Ukrainës

Presidenti kinez Xi Jinping i tha Donald Trump gjatë bisedimeve të tyre javën e kaluar se presidenti rus Vladimir Putin mund të pendohet për pushtimin e Ukrainës.

Sipas disa personave që janë në gjendje të vlerësojnë samitin e javës së kaluar në Pekin në emër të SHBA-së, presidenti kinez e bëri komentin gjatë bisedimeve që prekën edhe çështjen e Ukrainës dhe përfshinin propozimin e Trump që të tre udhëheqësit të bashkëpunojnë kundër Gjykatës Ndërkombëtare Penale.

Zbulimi vjen ndërsa Putin përgatitet të mbërrijë në Kinë sot, të martën, për t’u takuar me Xi, katër ditë pasi udhëheqësi kinez priti presidentin amerikan – ishte takimi i tyre i dytë që kur Trump u kthye në Shtëpinë e Bardhë.

Putini pushtoi Ukrainën në shkurt të vitit 2022, tre javë pas një udhëtimi në Kinë, në të cilin ai dhe Xi njoftuan bashkëpunim “të pakufishëm” . Vizita e tij dy-ditore këtë javë vjen 25 vjet pasi presidenti i atëhershëm Jiang Zemin nënshkroi një traktat miqësie sino-ruse me Putinin.

Ambasada kineze në Uashington nuk iu përgjigj një kërkese për koment. Shtëpia e Bardhë gjithashtu refuzoi të komentonte. Administrata Trump publikoi një njoftim të dielën në lidhje me Samitin e Pekinit, por nuk u përmendën diskutimet rreth Putinit apo luftës në Ukrainë.

Sipas njerëzve të njohur me bisedimet, gjatë samitit me Xi-në, Trump sugjeroi gjithashtu që SHBA-të, Kina dhe Rusia të bashkojnë forcat kundër Gjykatës Ndërkombëtare Penale, duke thënë se interesat e tyre ishin të përafërta.

Shtëpia e Bardhë nuk pranoi të komentojë mbi këtë çështje Megjithatë, administrata Trump ka shprehur më parë kundërshtim të fortë ndaj GJPN-së, duke e akuzuar atë për politizim, abuzim me pushtetin, përbuzje të sovranitetit të SHBA-së dhe teprime të paligjshme gjyqësore.

Komenti i Xi-t për Putinin erdhi në një kohë kur lufta e Rusisë në Ukrainë është futur në një ngërç pas katër vitesh, veçanërisht pasi Kievi është bërë efektiv në përdorimin e sulmeve me dronë kundër forcave dhe objektivave ruse.