Komisioni i Jashtëm miraton pr/buxhetin 2016

Komisioni i Politikës së Jashtme në Kuvend miratoi të hënën në tërësi
projektbuxhetin e vitit 2016. Sekretari i Përgjithshëm i MPJ-së, Qirjako Qirko, tha se buxheti për vitin 2016 ka një rritje prej 134 milione lekësh, ku 7 milione lekë janë shpenzime korrente dhe 127 milione lekë shpenzime kapitale.
Sekretari Qirko parashtroi disa nga objektivat dhe synimet që do të arrihen përmes këtij buxheti, si hapja e bisedimeve për anëtarësim me BE-në, zhvillimi i marrëdhënieve dypalëshe me partnerët strategjikë, njohja e shtetit të Kosovës, realizimi i kontributit politik të Shqipërisë në kuadër të NATO-s, zbatimi për çështjen e sigurisë dhe parandalimin e ekstremizmit, nxitja dhe mbështetja e diplomacisë ekonomike, realizimi i shërbimit konsullor, etj.
Duke iu përgjigjur interesit të kryetares së komisionit, Arta Dade, lidhur me trajtimin financiar të familjarëve të diplomatëve shqiptarë të atashuar në vende të ndryshme, sekretari Qirko tha se me ligjin “Për Shërbimin e Jashtëm” hapet një faqe e re në drejtim të diplomatëve tanë dhe anëtarëve të familjes së tyre.