ZAGREB – Varrimi shtetëror i kriminelit të luftës ndez reagimin e Kroacisë, Plenkoviç paralajmëron Serbinë

– Kryeministri i Kroacisë, Andrej Plenkoviç ka kritikuar Serbinë lidhur me planet për varrimin me nderime shtetërore dhe ushtarake të ish-komandantit të Ushtrisë Serbe të Bosnjës, Ratko Mladiç, i dënuar për gjenocid dhe krime lufte, sipas “N1 Info RS”

Plenkoviç, i cili është edhe kryetar i Bashkimit Demokratik Kroat (HDZ), ka paralajmëruar se një veprim i tillë mund të ketë pasoja për procesin e integrimit të Serbisë në Bashkimin Evropian.

Deklaratat e tij përbëjnë një mesazh të drejtpërdrejtë për Beogradin, nëse Mladiç varroset me nderime shtetërore dhe ushtarake, Serbia mund të përballet me pengesa të reja në rrugën e saj drejt anëtarësimit në BE.

Ndërkohë, presidenti i Serbisë, Aleksandar Vuçiç, është vënë nën presion për qëndrimin që do të mbajë lidhur me ceremoninë e varrimit.

Vuçiç ka deklaruar se Serbia do të ndihmojë në kthimin dhe varrimin e trupit të Mladiçit, ndërsa Ministria e Drejtësisë ka njoftuar se ai do të varroset me nderimet më të larta shtetërore.

Qëndrimi i Plenkoviçit e vendos Beogradin përballë një dileme të ndjeshme, ruajtjen e qëndrimit ndaj figurës së Mladiçit dhe trashëgimisë së luftës së Bosnjës, nga njëra anë, dhe përmbushjen e kërkesave e standardeve të Bashkimit Evropian në kuadër të procesit të anëtarësimit, nga ana tjetër.

Ratko Mladiç vdiq më 27 gusht në Hagë, në moshën 84-vjeçare, ndërsa vuante dënimin e përjetshëm për gjenocid, krime lufte dhe krime kundër njerëzimit.

Ai u dënua për rolin e tij në luftën e Bosnjës, përfshirë përgjegjësinë për masakrën e Srebrenicës dhe rrethimin e Sarajevës. /