Zhytësi polak Bartlomiej Pitala shpallet qytetar nderi i Shkupit pas rekordit në shpellën Vrelo

Këshilli i Qytetit të Shkupit e shpalli sot, më 5 nëntor, zhytësin polak Bartlomiej Pitala qytetar nderi, në seancën e Qytetit të Shkupit, siç njofton Fokus. Vendimi vjen pas thellësisë rekord prej 338 metrash që ai arriti në shpellën nënujore Vrelo në Matkë, e cila u bë shpella nënujore më e thellë e eksploruar në botë.

Kryebashkiaku Orce Gjorgjievski shkroi: “Bartlomiej Pitala – qytetar nderi i Shkupit, njeriu me veprën e të cilit bota dëgjoi për pasurinë tonë! Në 338 metra nën ujë, në thellësitë e Vrelos, zhytësi polak Bartlomiej Pitala shkroi histori! Në kuadër të ekspeditës ndërkombëtare ‘Vrelo 2026’, ai arriti thellësi rekord, me çka Vreloja jonë në Matkë u bë shpella nënujore më e thellë në botë e eksploruar nga njeriu. Vepër e guximit, dijes dhe përkushtimit të jashtëzakonshëm, e arritur me mbështetjen e një ekipi zhytësish nga Maqedonia, Polonia dhe Italia.”

Sipas Gjorgjievskit, ky sukses historik është mundësi e madhe që edhe më shumë turistë, studiues dhe dashamirë të natyrës ta vizitojnë qytetin. Me këtë mirënjohje, Shkupi i jep Pitalës respektin e merituar — njeriut që lëvizi kufijtë e eksplorimit. “Zoti Pitala la gjurmë në historinë e Vrelos dhe në zemrën e Shkupit. Nga sot, qyteti ynë është edhe i tij!”, shkroi kryebashkiaku.

Ekspedita u realizua më 17 tetor me ekip zhytësish nga Polonia, Italia dhe Maqedonia, ndërsa propozimi për qytetar nderi u dorëzua nga kryebashkiaku Gjorgjievski dhe Këshilli vendosi sot.