Zulfaj në Komisionin për Integrim Evropian: Kosova humbi 43.8 milionë euro nga Plani i Rritjes, 22 hapa duhen përmbushur deri më 31 dhjetor

Kryenegociatori me Bashkimin Evropian dhe koordinatori kombëtar për Planin e Rritjes, Jeton Zulfaj, raportoi sot në Komisionin për Integrim Evropian, ku bëri të ditur se Kosova ka humbur 43.8 milionë euro nga Plani i Rritjes i BE-së. Siç raporton Ekonomia Online, humbja erdhi pasi vendi nuk përmbushi 6 nga 13 hapat reformues që kishin afat shtesë deri në qershor 2026, ndërsa u përmbushën vetëm shtatë prej tyre.

Zulfaj ia la fajin bllokadës politike, duke theksuar se shumica e reformave të papërmbushura kërkonin miratim në Kuvend, i cili në atë kohë ishte i shpërndarë. Sipas tij, reformat tashmë janë rikthyer në proces, duke përmendur ligjet për energjinë dhe falimentimin, pakon për drejtësinë dhe strategjinë kundër krimit të organizuar.

Në total, plani për Kosovën kap vlerën 882.6 milionë euro, dy të tretat e të cilave janë kredi, dhe është i lidhur me 111 hapa reformash që duhen përmbushur deri në fund të gushtit të vitit të ardhshëm. Zulfaj tha se edhe komentet e Komisionit Evropian kërkojnë rreth 90 ditë, gjë që, sipas tij, shkakton vonesa në proces.

Më 15 korrik, Kosova dorëzoi kërkesën e parë për pagesë, me 20 hapa të zbatuar, në vlerë 153.4 milionë euro. Shuma përfundimtare, megjithatë, do të varet nga vlerësimi i Bashkimit Evropian, i cili pritet në ditët e para të nëntorit.

Ndërkohë, deri më 31 dhjetor duhen përmbushur edhe 22 hapa të tjerë, në vlerë 131.5 milionë euro, ndërsa 10 akte duhet të kalojnë në Kuvend. Projektligji për inovacion dhe ndërmarrësi ndodhet tashmë në Kuvend, kurse ligjet për prokurimin publik dhe partneritetin publiko-privat priten të dërgohen deri në fund të nëntorit.