2 persona vdesin në Australi nga virusi i rrallë që përhapet nga mushkonjat

Dy persona kanë humbur jetën nga encefaliti i Luginës Murray (MVE) në Alice Springs gjatë dy muajve të fundit, duke shtyrë autoritetet australiane të lëshojnë paralajmërime të reja shëndetësore në të gjithë Territorin Verior.

Sipas mediave lokale dhe ABC News, Departamenti i Shëndetësisë i Territorit Verior konfirmoi se vdekjet ndodhën në prill dhe maj, pa dhënë detaje të tjera për viktimat.

Alarmi erdhi pasi virusi u zbulua te mushkonjat në Darwin në fillim të këtij muaji, duke nxitur autoritetet të lëshojnë një këshillë publike për shëndetin.

Encefaliti i Luginës Murray është një sëmundje e rrallë, por potencialisht fatale, që transmetohet përmes pickimeve të mushkonjave të infektuara.

Zyrtarët shëndetësorë thanë se rastet janë më të zakonshme nga shkurti deri në qershor, ndërsa kulmi i infeksioneve zakonisht regjistrohet nga marsi në maj.

Simptomat përfshijnë dhimbje të forta koke, ethe, të përziera, të vjella, dhimbje muskujsh, përgjumje, konfuzion dhe kriza.

Autoritetet u kanë bërë thirrje banorëve dhe vizitorëve të përdorin repelentë kundër insekteve që përmbajnë DEET ose picaridin, të veshin rroba mbrojtëse dhe të shmangin zonat me shumë mushkonja, veçanërisht pas perëndimit të diellit.