26-vjeçari përplaset me automjetin e policisë në Kamëz, lëndohen dy efektivë

Dy punonjës policie kanë mbetur të dëmtuar pas përplasjes së automjetit të patrullës me një tjetër automjet në Kamëz.

Të dy efektivët janë dërguar në spital për të marrë ndihmë mjekësore dhe, sipas Policisë, ndodhen jashtë rrezikut për jetën.

Sipas Drejtorisë Vendore të Policisë Tiranë, automjeti i policisë ishte duke kryer patrullim në territorin ku ishte planifikuar me shërbim, kur u përplas nga një makinë e drejtuar nga 26-vjeçari Ronald Toshi.

I riu po lëvizte nga qendra e Kamzës në drejtim të rrugës “Berisha”, ndërsa dyshohet se ka humbur kontrollin mbi drejtimin e automjetit, duke shkaktuar përplasjen.

DVP Tiranë ka reaguar gjithashtu lidhur me informacionet e publikuara në media se ngjarja kishte ndodhur gjatë një ndjekjeje policore. Policia e mohon këtë version, duke e cilësuar pretendimin si të pavërtetë.

“Automjeti i Policisë, i cili ishte duke patrulluar në territorin ku ishte planifikuar me shërbim, është goditur nga një automjet me drejtues shtetasin Ronald Toshi, 26 vjeç”, sqaron Policia.

Si pasojë e aksidentit, dy efektivët kanë pësuar dëmtime, ndërsa 26-vjeçari nuk ka marrë lëndime. Ai është shoqëruar në ambientet e Komisariatit të Policisë, ku po kryhen veprimet procedurale për dokumentimin dhe sqarimin e plotë të rrethanave të aksidentit.