Kreu i Federatës së Futbollit të Kosovës, Agim Ademi, ka komentuar triumfin e Spanjës në Kupën e Botës 2026, duke e vlerësuar atë si një moment me rëndësi të veçantë për të gjithë kontinentin tonë.

I ftuar në emisionin SportCast të agjencisë së lajmeve Kosovapress, Ademi nëvizoi se rikthimi i trofeut më të çmuar të futbollit në Evropë konfirmon edhe një herë dominimin e futbollit evropian në skenën ndërkombëtare.

Pavarësisht raporteve politike jo të mira që Kosova ka me Spanjën, Ademi nëvizoi se në aspektin sportiv, suksesi i një kombëtareje evropiane ndikon pozitivisht te të gjithë anëtarët e UEFA-s, përfshirë edhe Kosovën. “Një e mirë është se Kupa e Botës erdhi në Evropë, duke pasur parasysh që kontinent ynë prin me klube, me futboll dhe me të gjitha kombëtaret – sidomos përmes nivelit të UEFA Champions League. pothuajse të gjithë futbollistët më të mirë të kontinenteve të tjera luajnë në ligat evropiane si në Spanjë, Gjermani, Itali e Belgjikë.

Nga aspekti i futbollit të UEFA-s, ardhja e Kupës së Botës këtu ka një impakt të madh për futbollin evropian dhe sigurisht edhe për atë të Kosovës”, tha ai.

Kreu i FFK-së zbuloi gjithashtu se përpara startit të fazës finale kishte parashikuar një ecuri fantastike të Spanjës dhe Francës, duke e parë këtë të fundit si favorite kryesore.

“Nëse e kam menduar se kush do të jetë fitues, një favorizim ia kam dhënë Francës – për mua ka qenë favoriti kryesor. Por edhe Spanja ka qenë në grupin e 3-4 ekipeve të mia favorite. Kam menduar se finalja do të jetë mes Spanjës dhe Francës. Franca ndoshta kishte ekipin më të kompletuar, por futbolli e tregoi sërish se është i paparashikueshëm. Spanja doli fituese dhe konfirmoi klasin e saj duke qenë njëkohësisht kampion evropian dhe kampion botëror”, shtoi Ademi.