POLONI – Policia arreston një shtetas rus të dyshuar për spiunazh

VARSHAVË, 30 tetor /ATSH-DPA/ – Policia polake ka arrestuar një shtetas rus, i dyshuar për spiunazh ndaj infrastrukturës hekurudhore në favor të një shërbimi të huaj zbulimi, njoftuan sot autoritetet lokale.

I arrestuari, 55 vjeç, u vu re nga policia në qytetin e Swidnicls, në rajonin e Silezisë së Poshtme, teksa fotografonte trenat që kalonin nëpër qytet, si dhe infrastrukturën hekurudhore.

Gjatë analizimit të materialeve të ruajtura në pajisjet elektronike të të dyshuarit, policia zbuloi dhe sekuestroi qindra mijëra skedarë që përmbanin fotografi të objekteve të rëndësishme të transportit.

I dyshuari ndodhet prej tre muajsh në paraburgim.

“Është mjaft e rrallë që kemi arritur të ndalojmë një shtetas rus”, deklaroi Tomasz Siemoniak, zëdhënës i koordinatorit të shërbimeve inteligjente të Polonisë.

Ai theksoi se shërbimet ruse të inteligjencës zakonisht shmangin përdorimin e shtetasve të tyre në operacione të tilla, duke preferuar të rekrutojnë persona nga vende të tjera, të cilët i cilësojnë si “agjentë të përdorshëm”.

Polonia, anëtare e Bashkimit Evropian dhe NATO-s, është një nga mbështetëset më të forta politike dhe ushtarake të Ukrainës në luftën e saj kundër pushtimit rus. Vendi ka pritur gjithashtu afro një milion refugjatë ukrainas që nga fillimi i luftës.

Qeveria polake ka akuzuar vazhdimisht shërbimet ruse dhe bjelloruse të inteligjencës për dërgimin e agjentëve të shumtë në territorin e saj. /Ad.Ab./ a.jor.