Aksident me 7 të plagosur në malin e Tomorrit, në makinë udhëtonin anëtarët e dy fiseve! Ja si paraqitet gjendja e tyre,

Shmanget tragjedia rrugore në një nga akset më të vështira në zonën e Malit të Tomorrit.

Ngjarja ndodhi sot (7 gusht) në orët e pasdites, në rrugën e fshatit malor Kapinovë të Beratit, ku një automjet me shtatë persona në bord ka dalë nga segmenti pasi është përplasur disa herë me bordurat anësore prej betoni.

Automjeti që drejtohej nga shtetasi Dritan Muço, ka humbur kontrollin në vendin e quajtur “Sheshi i Danit”, në hyrje të fshatit Kapinovë. Në mjet udhëtonin kryesisht anëtarë të të njëjtit fis.

Si pasojë e aksidentit kanë mbetur të plagosur drejtuesi i mjetit dhe gjashtë pasagjerët: Matilda Muço, Luan Muço, Drilon Muço, Desard Muço, si dhe shtetasit Marko Sojati dhe Xhesika Sojati.

Të plagosurit janë transportuar fillimisht me ambulancë në Spitalin Rajonal të Beratit. Pesë prej tyre, pasi morën ndihmën e parë mjekësore, janë larguar nga spitali, ndërsa drejtuesi i mjetit, i cili ka pësuar dëmtime në sy, dhe bashkëshortja e tij, Matilda Muço, e cila ka marrë dëmtime të rënda, janë transportuar për mjekim të specializuar në Spitalin e Traumës në Tiranë.

Në vendngjarje mbërritën forcat e policisë, të cilat kryen veprimet hetimore për zbardhjen e plotë të rrethanave të aksidentit.

Sipas të dhënave paraprake të policisë, dyshohet se shkak i aksidentit ka qenë një defekt teknik në automjet.

Gjatë ngjitjes drejt Malit të Tomorrit, mjetit dyshohet se nuk i kanë funksionuar frenat, duke bërë që të rrëshqasë, të përplaset disa herë me bordurat mbrojtëse dhe më pas të dalë nga rruga.

Policia bën me dije se testi i alkoolit i kryer ndaj drejtuesit të automjetit ka rezultuar negativ.