Aksidenti ku humbën jetën dy të mitur, Begaj: I tronditur! Institucionet të marrin masa për rritjen e sigurisë

Presidenti Bajram Begaj ka reaguar lidhur me aksidentin e rëndë të ndodhur në Durrës, ku një automjet përplasi tre fëmijë të mitur, duke i marrë jetën dy prej tyre dhe duke lënë një tjetër në gjendje të rëndë.

Presidenti Begaj shkruan se ndjehet i tronditur nga ngjarja, ndërsa i bën thirrje institucioneve përgjegjëse të marrin masa për rritjen e sigurisë në qarkullim.

Presidenti i përcjell ngushëllime familjarëve të viktimave dhe uron shërim për fëmijën e plagosur që ndodhet në spital.

“I tronditur thellë për aksidentin e tmerrshëm në Durrës, ku humbën jetën dy vogëlushë dhe një tjetër u plagos shumë rëndë. Lutem me përunjësi për shpirtrat e tyre! Ngushëllimet e mia më të sinqerta për prindërit dhe familjarët e dy engjëjve të vegjël.Uroj shërim për fëmijën që ndodhet i shtruar në spital. Institucionet përgjegjëse të marrin masa për rritjen e sigurisë në qarkullim, të bëjnë një hetim shterues për ngjarjen dhe qytetarët të rrisin përgjegjshmërinë për zbatimin e ligjit. Jeta dhe siguria e qytetarëve është e shenjtë!”, shkruan presidenti Begaj.

Ngjarja e rëndë ka ndodhur në lagjen nr. 15, e njohur edhe si ish-këneta në Durrës. Paraprakisht dyshohet që shkak për aksidentin të jetë bërë shpejtësia e lartë me të cilën udhëtonte drejtuesi 57-vjeçar, me inicialet N. R, i cili dyshohet se ka qen në gjendje të dehur gjatë momentin që ngiste automjetin. Sakaq, drejtuesi i automjetit është shoqëruar në Komisariat për veprime të mëtejshme procedurale.