Aksidenti me 68 të vdekur në Spanjë, zbardhen bisedat mes makinistëve dhe qendrës së kontrollit pak para përplasjes

Regjistrimet audio të publikuara në mediat spanjolle zbulojnë bisedat mes drejtuesve të trenit dhe qendrës së kontrollit hekurudhor në minutat para aksidentit tragjik të trenave, ku humbën jetën të paktën 68 persona dhe dhjetëra të tjerë u lënduan.

Autoritetet po hetojnë shkaqet e katastrofës, e cila ka ndodhur të mërkurën në mëngjes, kur një tren i shpejtësisë së lartë që udhëtonte nga Madridi drejt Seviljes u përplas me një tren të ndalur.

Tre regjistrime audio mes qendrës së kontrollit në Madrid dhe dy drejtuesve të trenit tregojnë se njërit prej trenave të shpejtësisë së lartë iu dha leje të vazhdonte lëvizjen, megjithëse rreth 25 kilometra më përpara ndodhej një tren tjetër që kishte ndaluar për shkak të një defekti.

Publikimi i regjistrimeve vjen në kohën kur Spanja nis tri ditë zie kombëtare për një nga aksidentet më të rënda hekurudhore në historinë moderne të Evropës.

Treni i ndalur, që operohej nga kompania Iryo, kishte ndaluar në shina për shkak të një defekti kompjuterik. Në atë moment, kontrollin e situatës e mori qendra e kontrollit në kryeqytetin spanjoll, e cila funksionon 24 orë në ditë.

Regjistrimet audio janë publikuar nga media spanjolle, përfshirë gazetën El País dhe transmetuesin RTVE.

Në njërin prej regjistrimeve, një operator i qendrës së kontrollit i thotë drejtuesit të trenit të kompanisë shtetërore hekurudhore Renfe që ta vazhdojë udhëtimin me shpejtësi normale, pas disa problemeve teknike.

“Vazhdoni udhëtimin dhe më pas ndiqni sistemin e bllokut me sinjalizim anësor, me shpejtësi normale dhe sipas procedurës së zakonshme”, i thotë operatori i qendrës së kontrollit makinistit.

Makinisti pyet: “Me shpejtësi normale?”.

Kontrollori përgjigjet: “Po”.

Sistemi i bllokut me sinjalizim anësor është një sistem rezervë ose alternativ i kontrollit të trenave, që përdoret kur sistemi automatik i sinjalizimit ose i transmetimit të të dhënave pëson defekt.

Më vonë, makinisti i trenit tjetër, të operuar nga kompania private Iryo, thotë në një regjistrim tjetër audio se lidhja me sistemin e kontrollit të trenit është ndërprerë dhe se treni ka ndaluar në Urda.

“Treni është i ndalur përpara sinjalit të hyrjes në Urda”, i thotë drejtuesi operatorit të qendrës së kontrollit. Pas një sërë shkëmbimesh, drejtuesit i thuhet që ta “vazhdojë udhëtimin” normalisht.

Sipas një regjistrimi të mëvonshëm, drejtuesi i trenit të Iryo-s kontakton sërish qendrën e kontrollit dhe thotë se nuk mund ta nisë trenin.

“Treni nuk më lejon ta kontrolloj sistemin e sigurisë. Prandaj jam ende i ndalur përpara sinjalit të hyrjes”, thotë ai.

Regjistrimi i fundit sugjeron se kontrollori ishte njoftuar që treni i Iryo-s vazhdonte të ishte i ndalur, ndërsa treni i Renfe-s po afrohej.

Kompania Iryo ka thënë se treni i saj, në të cilin ndodheshin 147 pasagjerë, ishte “goditur nga prapa” nga një tren tjetër i kompanisë Renfe, i cili transportonte 397 pasagjerë.

Ministri i Transportit i Spanjës, Oscar Puente, ka thënë të mërkurën se vendimi për të udhëzuar trenat që të lëvizin përsëri, pa asnjë kufizim shpejtësie, ishte “i pashpjegueshëm”.