Ambasada e Republikës së Shqipërisë mirëpret ekspozitën e bashkëshorteve të ambasadorëve

Pas suksesit të shënuar në Ekspozitën Ndërkombëtare të mbajtur më 24 prill 2026 në Universitetin Normal të Hebeit, veprat artistike të bashkëshorteve të ambasadorëve u prezantuan sërish në një aktivitet të veçantë të organizuar në Ambasadën e Republikës së Shqipërisë nën kujdesin e zonjës Ilda Poda, bashkëshortes së ambasadorit të Republikës së Shqipërisë.

Ilda Poda, bashkëshortja e ambasadorit shqiptar në Kinë/CMG

Ekspozita mblodhi përfaqësues të trupit diplomatik dhe bashkëshorte ambasadorësh nga Shqipëria, Maroku, Maqedonia e Veriut, Holanda, Vietnami, Indonezia, Jordania, Letonia, Islanda, Guinea, Ekuadori etj… Të pranishmit patën mundësinë të njiheshin nga afër me krijimet artistike, të cilat pasqyrojnë kultura, tradita dhe perspektiva të ndryshme artistike.

Foto nga CMG

Veprat e ekspozuara, të vlerësuara më herët edhe gjatë aktivitetit në Universitetin Normal të Hebeit, morën vëmendje dhe vlerësime pozitive nga pjesëmarrësit, duke dëshmuar nivelin e lartë të angazhimit artistik dhe kulturor të autoreve.

Foto nga CMG

 

Foto nga CMG

Në fjalët e tyre, të ftuarit theksuan rëndësinë e aktiviteteve të tilla në forcimin e dialogut kulturor dhe miqësisë ndërmjet vendeve. Ekspozita u shndërrua në një hapësirë takimi, ku arti shërbeu si gjuhë universale për të afruar komunitetin diplomatik dhe për të promovuar mirëkuptimin ndërkulturor.

Foto nga CMG

Përmes kësaj nisme, Ambasada e Republikës së Shqipërisë rikonfirmoi angazhimin e saj për promovimin e diplomacisë kulturore dhe mbështetjen e aktiviteteve që kontribuojnë në forcimin e lidhjeve ndërmjet kombeve dhe popujve.

Me këtë rast, grupit të bashkëshorteve të diplomatëve iu prezantua gjithashtu Shqipëria turistike nëpërmjet pamjeve të bukura nga kolazhi fotografik i fotografit të mirënjohur shqiptar Alket Islami.