Ambasadori i Rusisë, Zikov: Shkupi nuk mund të konsiderohet ruso-fobik i ashpër

Ambasadori i Rusisë në Maqedoninë e Veriut, Dmitrij Zikov, ka deklaruar se “Shkupi nuk mund të konsiderohet ruso-fobik i ashpër”, duke theksuar se autoritetet nuk bëjnë deklarata luftënxitëse dhe nuk e frikësojnë popullatën me “kërcënimin nga Lindja”. Komenti i tij për gazetën ruse “Izvestia” është publikuar, në pikat kyçe, në faqen zyrtare të Ambasadës së Rusisë në Facebook.

Sipas Zikovit, shoqëria lokale nuk është e interesuar për eskalim të situatës. Ai është ndalur edhe tek çështja e buxhetit të mbrojtjes: vendi ka shpallur si qëllim shpenzimet prej 5% të PBB-së për mbrojtjen dhe i ka dhënë ndihmë ushtarako-teknike Kievit — sipas ambasadorit rus, “në kuadër të ndjekjes së ‘mainstream-it perëndimor'”. Zikov e ka quajtur naive idenë se rritja e shpenzimeve buxhetore për mbrojtjen nuk do të ndikojë edhe në sferat joushtarake.

Lidhur me aspiratat e Shkupit për anëtarësim në Bashkimin Evropian, diplomati rus ka thënë se “zbatimi i të gjitha udhëzimeve të Brukselit është kundërproduktiv për interesat e Shkupit”, duke shtuar se kjo nënkupton braktisjen e dialogut me Moskën. “Jemi gati të ndërtojmë marrëdhënie mbi bazën e respektimit të ndërsjellë të interesave kombëtare, por fatkeqësisht nuk e shohim këtë mirëkuptim nga Shkupi”, është shprehur ai.

Zikov ka shtuar se shumica e maqedonasve kanë simpati për Rusinë dhe se kjo, sipas tij, “mund të shërbejë si bazë për rinovimin e ardhshëm të marrëdhënieve”.

Burimi: Макфакс