ANALIZA / Sekreti i titullit të 21-të zikaltër, besimi tek interistët e vërtetë

Një titull i papritur ai i Interit të Chivu, madje befasues. Ka të drejtë trajneri i ri zikaltër që thekson gjithmonë se korrikun e kaluar, kur mori në dorë ekipin, askush nuk besonte pas katastrofës së finales së Champions-it të shkuar dhe udhëtimit të vështirë në SHBA për Botërorin e Klubeve, që ndikoi në përgatitje.

Pa folur për fillimin e kampionatit. Që më 14 shtator, pas humbjes së dytë radhazi (4-3 në Torino me Juven, pas 2-0 në ‘San Siro’ me Udinese), askush nuk do të vinte bast për Interin e dëmtuar të atyre ditëve. Legjenda gazetareske se Chivu nuk mund të mos fitonte, sepse kishte “ekipin më të forte në Serie A” lindi më pas.

Chivu fitoi në shenjën e një revolucioni ndaj futbollit të vjetër italian. Nuk ishte parë të fitohej pa mbrojtjen më të mirë dhe pa triumfuar në ndeshjet direkte (përjashto 3-2 me Juven). Sekreti vjen nga intuita e dyshes Marotta-Ausilio. Pas largimit të Inzaghit për tripletën e munguar, u zgjodh Chivu.

Një “bast” me logjikë, që t’i besohej një interisti. Nga viti 2007 zikaltër, 20 vite në “Appiano” për rumunin. Zgjedhja galvanizoi grupin, ambientin dhe tifozët. “Oaktree” vendosi kufizime; kosto të ulëta dhe lojtarë të rinj. Vështirësi në merkato, sepse Napoli mori De Bruyne, Milani mori Modric-Rabiot, ndërsa Interi u përgjigj me të rinj premtues si Sucic.

Asnjë top-lojtar i ardhur. Nuk u rrit oferta për Lookman dhe mungoi një mbrojtës i djathtë në janar. Me titullin e 21-të, tifozët shpresojnë ndryshimin. Fitoret janë receta më e mirë. Më mirë blerje (top) se sa shitje (Bastoni) dhe besim tek interistët e vërtetë.