SDSM: Mickoski është i pakënaqur sepse fon der Lajen ia hoqi tezën se identiteti maqedonas është i rrezikuar

Opozita maqedonase SDSM e akuzoi këtë mëngjes kryeministrin Hristijan Mickoski se po e përdor çështjen e integrimit europian dhe atë të identitetit maqedonas për qëllime politike, pasi ai deklaroi se nuk ishte i kënaqur me mesazhet e presidentes së Komisionit Europian Ursula von der Leyen në lidhje me ndryshimet kushtetuese, siç njofton këtë mëngjes portali Fokus.mk.

Sipas reagimit të SDSM-së, Mickoski e cilësoi takimin me von der Leyen si kyç, por shprehu pakënaqësi për mesazhin e saj se ndryshimi i Kushtetutës mbetet kusht për vazhdimin e procesit europian. “Fon der Lajen tha qartë: në tryezë qëndron ndryshimi i Kushtetutës. Dhe theksoi: Europa ju pret me identitetin tuaj dhe me gjuhën tuaj. Është po ajo fjali që Mickoski e shiste si tradhti”, thuhet në reagimin e partisë opozitare.

SDSM kujton pozicionet e mëparshme të VMRO-DPMNE-së për Marrëveshjen e Prespës, emrin e shtetit dhe procesin europian, duke vlerësuar se qëndrimet e pushtetit kanë ndryshuar pas ardhjes në pushtet. Sipas partisë, mesazhi i von der Leyen se identiteti dhe gjuha maqedonase janë të mirëseardhura në BE hedh poshtë tezën se ato rrezikohen me vazhdimin e integrimeve europiane.

“I pakënaqur është sepse ia hoqën gënjeshtrën, jo sepse dikush po i prek identitetin maqedonas”, thuhet në reagim, ku shtohet se hapi i radhës mbetet zhbllokimi i procesit europian, hapja e kapitullit “Bazat” dhe zbatimi i reformave, sidomos në sundimin e ligjit, gjyqësorin, prokurorinë dhe luftën kundër korrupsionit.