Anëtarësimi në BE, PS: Procesi po vijon pa bllokime – Tv Klan

Mazhoranca këmbëngul se nuk ka bllokim të negociatave me Bashkimin Europian ndryshe nga sa deklaron opozita prej disa javësh.

Nga mbledhja e Këshillit Kombëtar të Integrimit Europian, kryetari Taulant Balla, tha se progres raporti për Shqipërinë i miratuar në Komisionin e Jashtem të PE, është sinjal i fortë mbështetje Brukseli për progresin e reformave.

“Shqipëria nuk ka qenë kurrë më afër Europës sesa është sot. Nuk flitet për ngecje, nuk flitet për humbje drejtimi, pasiguri, flitet vetëm për avancim, ritëm, besueshmëri, për një Shqipëri që po hyn seriozisht në fazën përmbyllëse të rrugës europian. Secila palë duhet ta lexojë me përgjegjësi këtë proces. të gjithë bashkë duhet të punojë për ta jetësuar këtë aspiratë historike”, tha Balla.

Ndërsa Shqipëria është në pritje të miratimit të raportit IBAR, kryenegociatorja Majlinda Dhuka, thotë se janë bërë përgatitjet teknike për mbylljen e të paktën 10 kapitujve brenda këtij viti.

“Sfida jonë është mbyllja e kapitujve me dinjitet, me cilësi dhe rezultate të pakthyeshme, me Shqipërinë si vend europian. 101 piketa mbyllëse ka marrë sot Shqipëria nga BE. Po përgatitemi teknikisht për mbylljen e të paktën 10 kapitujve të parë. Sa i përket kapitujve për “marrëdhëniet me jashtë”, “kërkimi shkencor” dhe “arsimi”, ne vlerësojmë se Shqipëria i ka kryer të gjitha përgatitjet teknike për mbylljen e tyre, pritet më pas vendimi i BE-së”, tha Dhuka.

Për ministrin Toni Gogu sfide mbetet eficenca në sistemin e drejtësisë.

Në mbledhjen e Këshillit Kombëtar të integrimit nuk morën pjesë përfaqësues nga opozita.

Klan News

/tvklan.al