Anije tregtare indiane goditet pranë Omanit, një detar i vrarë dhe 13 të shpëtuar

Një detar indian ka humbur jetën pas sulmit ndaj një anijeje tregtare pranë Limah-ut, në bregdetin e Omanit. Siç njofton Reuters, Ministria e Jashtme e Indisë tha të martën se nga 14 shtetasit indianë që ndodheshin në bordin e anijes MSV Al Jusufi, 13 u shpëtuan pas incidentit të së hënës, ndërsa njëri prej tyre nuk mbijetoi.

Ministri indian i Porteve, Transportit Detar dhe Rrugëve Ujore, Sarbananda Sonowal, tha sipas raportimit të agjencisë ANI se anija me flamur indian u godit më 2 nëntor nga një objekt ajror i paidentifikuar, ndërsa lundronte pranë bregdetit të Omanit. Tredhjetëmbëdhjetë anëtarët e tjerë të ekuipazhit u evakuuan shëndoshë e mirë dhe u shpëtuan nga Roja Bregdetare e Omanit, ndërsa detari që humbi jetën u identifikua si Gandhar Nahim Ajij, nga shteti indian Gujarat, i cili ndërroi jetë nga plagët e marra.

Sonowal shprehu ngushëllimet për familjen e viktimës dhe tha se ministria që ai drejton dhe ambasada indiane në Oman janë në kontakt me autoritetet vendase, për t’u dhënë ndihmë të menjëhershme 13 të mbijetuarve dhe për të lehtësuar riatdhesimin e shpejtë të tyre dhe të trupit të detarit të vrarë.

Sipas Al Jazeera, Ministria e Jashtme e Indisë e dënoi sulmin ndaj anijes dhe shprehu shqetësim të thellë për incidentet e vazhdueshme të sulmeve ndaj anijeve tregtare në rajon, duke theksuar se shënjestrimi i lundrimit tregtar dhe i infrastrukturës civile duhet të marrë fund.

Incidenti vjen në një kohë kur lufta mes Shteteve të Bashkuara dhe Iranit e ka rritur ndjeshëm rrezikun për anijet tregtare që lundrojnë në ujërat rreth Ngushticës së Hormuzit dhe Gjirit Persik, ku sulmet ndaj anijeve dhe detarëve janë raportuar në mënyrë të përsëritur gjatë konfliktit.