Arrestohen gjashtë persona në Serbi: mashtronin familjet e të arrestuarve nga Kosova, u morën rreth 28.000 euro

Më 13 nëntor, në një aksion të sinkronizuar në Novi Pazar, Kraljevë dhe Kragujevc, u arrestuan gjashtë persona të dyshuar si anëtarë të një grupi kriminal që mashtronte familjet e personave nga Kosova të arrestuar nën dyshime për krime lufte, siç njofton portali SNM, duke iu referuar Prokurorisë Publike për Krimin e Organizuar (JTOK).

Sipas Prokurorisë, nga maji deri në shtator 2026, të dyshuarit telefononin familjarët e të paraburgosurve dhe u premtonin status e kushte më të mira në paraburgim, trajtim më të favorshëm dhe madje lirim, duke u kërkuar në këmbim mijëra euro — edhe pse, sipas hetuesve, nuk kishin asnjë mundësi reale të ndikonin në pozitën e të paraburgosurve.

Aksioni u zhvillua në një operacion të përbashkët të Prokurorisë për Krimin e Organizuar, SBPOK-ut, BIA-s, Xhandarmërisë dhe Drejtorisë së Policisë Kriminale (UKP) – Departamentit për Aksione të Veçanta, dhe përfshiu arrestime dhe bastisje në disa lokacione në të tri qytetet. Grupi, sipas Prokurorisë, vepronte bashkë me dy bashkëpunëtorë që tashmë vuajnë dënime me burg.

Hetimi ka identifikuar deri tani gjashtë familje të dëmtuara, nga të cilat grupi përfitoi në mënyrë të paligjshme rreth 28.000 euro. Prokuroria dyshon se numri i viktimave është dukshëm më i madh dhe u bën thirrje qytetarëve që kanë marrë telefonata e oferta të ngjashme të paraqiten urgjentisht te SBPOK-u i Ministrisë së Brendshme të Serbisë.

Të arrestuarve u ngarkohen veprat penale të bashkimit për kryerje veprash penale dhe mashtrimit të vazhduar. Ata konsiderohen të pafajshëm derisa faji të provohet me vendim të formës së prerë.