Arrestohet 38-vjeçari në Himarë, u kap me armë, granatë dhe jelekë antiplumb

Policia e Himarës ka arrestuar në flagrancë një 38-vjeçar nga Vlora, gjatë një operacioni të koduar “Siguria 2”, të zhvilluar në kuadër të kontrolleve të shtuara për goditjen e veprimtarive kriminale.

Shtetasi me inicialet E. H., me precedentë penalë për krime kundër personit, u ndalua te zona e njohur si “Kthesa e Pilurit”, ndërsa qarkullonte me automjet. Gjatë kontrollit, policia gjeti në çantën e tij një pistoletë me krehër të mbushur me fishekë dhe një granatë.

Kontrollet vijuan edhe në banesën e 38-vjeçarit në Vlorë, ku u sekuestruan një tjetër pistoletë, krehra, municion luftarak, dy jelekë antiplumb dhe dy jelekë multifunksionalë.

Në cilësinë e provës materiale u sekuestruan dy armët e zjarrit, granata, municioni, katër jelekët, automjeti dhe dy telefona celularë.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprat penale “Mbajtja pa leje dhe prodhimi i armëve, armëve shpërthyese dhe municionit” dhe “Mbajtja pa të drejtë e uniformës”.