Arrestohet në Belgjikë Gert Gjenerali, i dënuar me burgim të përjetshëm për vrasje në ’97

Është arrestuar në Belgjikë këtë të hënë (15 qershor) Gerd Gjinarari, ose i njohur ndryshe si “Gert Gjenerali”.

Ai është shpallur fajtor për vrasjen e Naim Zyberit, një prej personazheve të njohur të botës së krimit në kryeqytet të viteve ’90.

Për këtë ngjarje, Gjinarari u dënua me burgim të përjetshëm nga drejtësia italiane në vitin 2014 dhe u ekstradua në Shqipëri për të vuajtur dënimin. Por, në vitin 2019, ai u lirua me kusht nga Gjykata e Korçës, i cili u rrëzua nga Apeli dhe duke urdhëruar rikthimin e tij në burg për të vuajtur pjesën e mbetur të dënimit.

Pas këtij vendimi, Gjinerari u shpall në kërkim ndërkombëtar, e që u arrestua ditën e sotme teksa pritet dhe ekstradimi i tij.

Krimi për të cilën është shpallur fajtori “Gert Gjenerali” ka ndodhur në vitin 1997, në një spital të Milanos, ku Naim Zyberi po merrte trajtim mjekësor. Sipas hetimeve, ai së bashku me Arben Grori, kanë hyrë në dhomën e spitalit duke u paraqitur si të afërm të Zyberit dhe e vranë me armë zjarri.