Arrestohet në Vlorë personi që rrahu gruan në sy të fëmijëve

Policia e Vlorës reagoi pas videos të shpërndarë në media teksa shih një burrë që dhunonte në mënyrë çnjerëzore një grua në sy të fëmijëve të saj, duke e vendosur në pranga autorin.

Mësohet se shtetasi që rreh gruan në rrugë, quhet Ilir Paja ndërsa shtetasja e dhunuar, M.C. Gruaja është marrë në pyetje nga policia menjëherë pas publikimit të videos. Mësohet se çifti kishin 3 vite të divorcuar, por pavarësisht kësaj, Paja duket se nuk ka hequr dorë nga ish-gruaja.

Mësohet se nëna e tre fëmijëve, dy prej të cilëve i kishte me vete po kthehej nga tregu kur është ndeshur në rrugë rastësisht me ish-burrin. Gazetarët lokalë të qytetit të Vlorës thonë se çifti kishte tre vjet i divorcuar dhe gruaja mezi i rriste tre fëmijët e mitur për shkak të mungesës së të ardhurave.

Ata kanë pasur një debat mes tyre në rrugë më pas burri është nervozuar se gruaja në një moment e ka shtyrë. Pjesën tjetër të aktit të rëndë e tregon më së miri video, se si ky burrë vërsulet mbi nënën e fëmijëve të tij, të cilët ulërrasin, por as thirrjet e tyre nuk i dëgjon.

Njoftimi i policisë

Arrestohet autori i dhunës së publikuar në rrjete sociale

Arrestohet në flagrancë për dhunë fizike ndaj ish-bashkëshortes së tij, shtetasi i quajtur: Ilirjan Pajo, 44 vjeç, banues në lagjen “11 Janari” Vlorë. Shërbimet e Policisë së Vlorës kanë bërë arrestimin e menjëhershëm të tij pasi ky shtetas, rreth orës 10:00, në tregun e madh në lagjen “28 Nëntori” pranë “Alfa Bank”, për motive të dobëta, ka ushtruar dhunë fizike kundrejt ish-bashkëshortes së tij, shtetases me iniciale M.C., 38 vjeç, banuese në lagjen “24 Maji” Vlorë. Arrestimi i këtij shtetasi u bë në dalje të qytetit të Vlorës në vendin e quajtur “Pus-Mezini”, duke tentuar t’u largohej shërbimeve të policisë.