Arrestohet një shtetas gjerman në Gjilan, i sekuestrohen 43 armë të gjata automatike

Policia e Kosovës, në bashkëpunim me Prokurorinë Speciale të Republikës së Kosovës (PSRK), arrestoi një shtetas gjerman, të identifikuar me inicialet L.S., nën dyshimin për përfshirje në krim të organizuar dhe trafikim të kundërligjshëm të armëve, siç njofton Telegrafi.

Sipas raportimit të KosovaPress, arrestimi u krye nga hetuesit e Drejtorisë për Hetimin e Krimit të Organizuar dhe Krimeve të Rënda, me urdhër të Prokurorisë Speciale, pas hetimeve të përbashkëta. I dyshuari u ndalua fillimisht në rajonin e Gjilanit (Anamoravë).

Pas ndalimit, automjeti me të cilin ai po udhëtonte u dërgua për kontroll dhe skanim të mëtejshëm, ku u gjetën dhe u sekuestruan 43 armë të gjata automatike.

Me urdhër të Prokurorisë Speciale, ndaj tij u caktua masa e ndalimit prej 48 orësh, nën dyshimin për dy vepra penale: “Pjesëmarrja ose organizimi i grupit kriminal të organizuar” dhe “Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materialeve plasëse”.

Hetuesit po vazhdojnë të gjitha veprimet e nevojshme hetimore për zbardhjen e plotë të rastit, përfshirë verifikimin e origjinës dhe destinacionit të armëve. Policia dhe PSRK-ja thanë se do ta mbajnë publikun të informuar në përputhje me ligjin dhe pa dëmtuar hetimin.